مقالات واراء

خاص لطلاب الثانوية العامة في مصر

خاص لطلاب الثانوية العامة في مصر

ابني الغالي اللي مجموعه مش عاجبه النهاردة، واللي مجموعه عالي وعاجبه اوي، من فضلكم اقروا المقال دة كويس جداً:

خاص لطلاب الثانوية العامة في مصر

اولا: التعليم المصري اللي بيعتمد على التلقين والحفظ الاعمى، لا يستحق اننا نديله الاهتمام دة كله وتحرق من دمك واعصابك، حرقة الدم دي سببها الاوهام وشدة الاعصاب اللي اهلك عايشين فيها لانهم مش عاوزين يعترفوا بالحقيقة اللي بتقول ان نجاحك في حياتك مش متوقف على نتيجتك النهاردة ولا حاجة.

ثانيا: بصرف النظر انت مجموعك كبير ولا قليل، صدقني مش فارقة كتير، لانك لو مشيت في حياتك زي اغلب المصريين فغالبا انت ناوي تشتغل اي شغلانة متاحة قدامك وخلاص، يعني مش هتشتغل في شغفك، ودة معناه انك هتشتغل بحثا عن مرتب وليس بحثا عن نفسك، فهتعيش عمرك كله بتجري ورا المرتب سواء جبت النهاردة ١٠١٪ ولا جبت ٥١٪ … مبقتش فارقة كتير.

شوف هوايتك ، وكمل تعليمك عشان تفتح لدماغك نطاق تفكير في نقطة واحدة بس، وهي ازاي تحول هوايتك لاكل عيشك.

مش هكلمك عن مصر وعن البلد، هكلمك عن نفسك، هأقولك صنع المستقبل ملوش غير طريقة واحدة، انك تبقى حابب اوي مجالك، اللي بيحب مجاله عمره ما بيبقى موظف بالمعنى السلبي اياه.
عمره ما هيبقى مرتشي
عمره ما هيبقى بيمضي حضور وبعدين يزوغ
عمره ما هيشتغل على اد فلوسهم
عمره ما هيعيش مطاطي راسه في الارض مكسور الخاطر.

ركز على مستقبلك، التعليم بتاعنا ميأكلش عيش صدقني، الا لو انت نابغة وفلتة في حتة معينة وهيخطفوك في الدول اللي بتحترم العقول بعد الشر علينا

إنك تكون سباك مخلص في شغله ومبدع ومحترم، أحسن مية مرة لنفسك ولبلدك من انك تكون دكتور والاول على دفعتك كمان بس مرتشي وغير مخلص وتاجر أعضاء …. متحددش اسم مهنتك دلوقتي، حدد هوايتك ايه ومارسها واشبع منها كتير لحد ما تخليها هوايتك.

مصر كل سنة بتخرج الاف الشباب في المجالات المختلفة وبيتم تسكينهم على القهاوي حسب توزيع جغرافي دقيق، ناوي تبقى واحد منهم؟

شوف انت بتحب ايه، واختار اقرب كلية تخدم هوايتك وتدعمها، عيش اللي تحبه، أهلك بيحبوك؟؟؟ طبعا
بس انت ادرى بنفسك، والدك اللي عاوزك دكتور او مهندس دي امنية حياتك، لكن مش شرط ان دي تبقى قدراتك وميولك.

الحياة بتعيشها مرة واحدة، فبلاش تضيع فيها وقت في الحيرة وشدة الاعصاب، استغل كل لحظة انك تعمل الحاجة اللي بتحبها فعلا، خليك انت قائد حياتك، محدش في الكون كله بعد ربنا له السلطة دي.

اسأل نفسك بشجاعة … انا زعلان ليه؟ عشان المجموع وحش؟
يعني ايه مجموع؟ لو طلعت الاول على الجمهورية هيجرا ايه يعني؟
هتنتهي انك برضه موظف بمرتب، الصح انك تفكر دلوقتي، انا هوايتي ايه؟ وازاي احولها مصدر رزقي؟

دة السؤال الصح: ولو معندكش اجابته يبقى جه الوقت انك تدور على الاجابة.

متضيعش نفسك …. وعيش شغفك

الوسوم
اظهر المزيد

مقالات ذات صلة

اترك تعليقاً

إغلاق